مرزا غالب
حسنِ مہ گرچہ بہ ہنگامِ کمال اچھا ہے
اس سے میرا مہہ خورشید جمال اچھا ہے
بوسہ دیتے نہیں اور دل پہ ہے ہر لحظہ نگاہ
جی میں کہتے ہیں کہ مفت آئے تو مال اچھا ہے
اور بازار سے لے آئے اگر ٹوٹ گیا
ساغرِ جم سے مرا جامِ سفال اچھا ہے
بے طلب دیں تو مزا اس میں سوا ملتا ہے
وہ گدا جس کو نہ ہو خوئے سوال اچھا ہے
ان کے دیکھے سے جو آ جاتی ہے منہ پر رونق
وہ سمجھتے ہیں کہ بیمار کا حال اچھا ہے
دیکھیے پاتے ہیں عشاق بتوں سے کیا فیض
اک برہمن نے کہا ہے کہ یہ سال اچھا ہے
ہم سخن تیشہ نے فرہاد کو شیریں سے کیا
جس طرح کا کہ کسی میں ہو کمال اچھا ہے
قطرہ دریا میں جو مل جاے تو دریا ہو جائے
کام اچھا ہے وہ جس کا کہ مآل اچھا ہے
خضر سلطاں کو رکھے خالقِ اکبر سرسبز
شاہ کے باغ میں یہ تازہ نہال اچھا ہے
ہم کو معلوم ہے جنت کی حقیقت‘ لیکن
دل کے خوش رکھنے کو غالب یہ خیال اچھا ہے
امیر مینائی
اچھے عیسیٰ ہو مریضوں کا خیال اچھا ہے
ہم مرے جاتے ہیں تم کہتے ہو حال اچھا ہے
تجھ سے مانگوں میں تجھی کو کہ سبھی کچھ مل جائے
سو سوالوں سے یہی ایک سوال اچھا ہے
دیکھ لے بلبل و پروانہ کی بیتابی کو
ہجر اچھا نہ حسینوں کا وصال اچھا ہے
آ گیا اس کا تصور تو پکارا یہ شوق
دل میں جم جائے الٰہی یہ خیال اچھا ہے
آنکھیں دکھلاتے ہو جوبن تو دکھاؤ صاحب
وہ الگ باندھ کے رکھا ہے جو مال اچھا ہے
برق اگر گرمئ رفتار میں اچھی ہے امیر
گرمیٔ حسن میں وہ برق جمال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جلیل مانک پوری
نہ خوشی اچھی ہے‘ اے دل! نہ ملال اچھا ہے
یار جس حال میں رکھے وہی حال اچھا ہے
دلِ بیتاب کو پہلو میں مچلتے کیا دیر
سن لے اتنا کسی کافر کا جمال اچھا ہے
بات الٹی وہ سمجھتے ہیں جو کچھ کہتا ہوں
اب کے پوچھا تو یہ کہہ دوں گا کہ حال اچھا ہے
صحبت آئینے سے بچپن میں خدا خیر کرے
وہ ابھی سے کہیں سمجھیں نہ جمال اچھا ہے
مشتری دل کا یہ کہہ کہہ کے بنایا ان کو
چیز انوکھی ہے‘ نئی جنس ہے مال اچھا ہے
چشم و دل جس کے ہوں مشتاق وہ صورت اچھی
جس کی تعریف ہو گھر گھر وہ جمال اچھا ہے
یار تک روز پہنچتی ہے برائی میری
رشک ہوتا ہے کہ مجھ سے مرا حال اچھا ہے
اپنی آنکھیں نظر آتی ہیں جو اچھی ان کو
جانتے ہیں مرے بیمار کا حال اچھا ہے
باتوں باتوں میں لگا لائے حسینوں کو جلیل
تم کو بھی سحر بیانی میں کمال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تلوک چند محروم
طائرِ دل کے لیے زلف کا جال اچھا ہے
حیلہ سازی کے لیے دانۂ خال اچھا ہے
دل کے طالب نظر آتے ہیں حسیں ہر جانب
اس کے لاکھوں ہیں خریدار کہ مال اچھا ہے
تاب نظارہ نہیں گو مجھے خود بھی‘ لیکن
رشک کہتا ہے کہ ایسا ہی جمال اچھا ہے
دل میں کہتے ہیں کہ اے کاش نہ آئے ہوتے
ان کے آنے سے جو بیمار کا حال اچھا ہے
مطمئن بیٹھ نہ اے راہروِ راہِ عروج
ترا رہبر ہے اگر خوفِ زوال اچھا ہے
نہ رہی بے خودیٔ شوق میں اتنی بھی خبر
ہجر اچھا ہے کہ محروم وصال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احمد فراز
نہ شب و روز ہی بدلے ہیں نہ حال اچھا ہے
کس برہمن نے کہا تھا کہ یہ سال اچھا ہے
ہم کہ دونوں کے گرفتار رہے‘ جانتے ہیں
دامِ دنیا سے کہیں زلف کا جال اچھا ہے
میں نے پوچھا تھا کہ آخر یہ تغافل کب تک
مسکراتے ہوئے بولے کہ سوال اچھا ہے
لذتیں قرب و جدائی کی ہیں اپنی اپنی
مستقل ہجر ہی اچھا نہ وصال اچھا ہے
رہروانِ رہِ الفت کا مقدر معلوم
ان کا آغاز ہی اچھا نہ مآل اچھا ہے
دوستی اپنی جگہ پر یہ حقیقت ہے فراز
تری غزلوں سے کہیں تیرا غزال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عدیم ہاشمی
راحتِ جاں سے تو یہ دل کا وبال اچھا ہے
اس نے پوچھا تو ہے اتنا ترا حال اچھا ہے
ماہ اچھا ہے بہت ہی نہ یہ سال اچھا ہے
پھر بھی ہر ایک سے کہتا ہوں کہ حال اچھا ہے
ترے آنے سے کوئی ہوش رہے یا نہ رہے
اب تلک تو ترے بیمار کا حال اچھا ہے
یہ بھی ممکن ہے تری بات ہی بن جائے کوئی
اسے دے دے کوئی اچھی سی مثال اچھا ہے
دائیں رخسار پہ آتش کی چمک وجہِ جمال
بائیں رخسار کی آغوش میں خال اچھا ہے
آؤ پھر دل کے سمندر کی طرف لوٹ چلیں
وہی پانی‘ وہی مچھلی‘ وہی جال اچھا ہے
کوئی دینار نہ درہم نہ ریال اچھا ہے
جو ضرورت میں ہو موجود وہ مال اچھا ہے
کیوں پرکھتے ہو سوالوں سے جوابوں کو عدیم
ہونٹ اچھے ہوں تو سمجھو کہ سوال اچھا ہے
حفیظ جونپوری
خود بہ خود آنکھ بدل کر یہ سوال اچھا ہے
روز کب تک کوئی پوچھا کرے حال اچھا ہے
ہجر میں عیشِ گزشتہ کا خیال اچھا ہے
ہو جھلک جس میں خوشی کی وہ مآل اچھا ہے
داغ بہتر ہے وہی ہو جو دلِ عاشق میں
جو ر ہے عارضِ خوباں پہ وہ خال اچھا ہے
دیکھ ان خاک کے پتلوں کی ادائیں زاہد
ان سے کس بات میں حوروں کا جمال اچھا ہے
کیجیے اور بھی شکوے کہ مٹے دل کا غبار
باتوں باتوں میں نکل جائے‘ ملال اچھا ہے
تندرستی سے تو بہتر تھی مری بیماری
وہ کبھی پوچھ تو لیتے تھے کہ حال اچھا ہے
جو نگاہوں میں سما جائے وہ صورت اچھی
جو خریدار کو جچ جائے وہ مال اچھا ہے
چارہ گر کو مرے یہ بھی نہیں تمییز ابھی
کون سا حال برا‘ کون سا حال اچھا ہے
دے خدا زر تو کوئی مے کدہ آباد کریں
اچھے کاموں میں جو ہو صرف وہ مال اچھا ہے
ہنس کے کہتے ہیں کبھی ہاتھ سے اڑنے کا نہیں
طائرِ رنگِ حنا بے پر و بال اچھا ہے
جو نہ نکلے کبھی دل سے وہ تمنا اچھی
جو نہ آئے کبھی لب تک وہ سوال اچھا ہے
حسرت آتی ہے ہمیں حال پر اپنے کیا کیا
سنتے ہیں جب کسی بیمار کا حال اچھا ہے
حور کے ذکر پر آئینہ اٹھا کر دیکھا
اس سے ایماں ہے کہ میرا ہی جمال اچھا ہے
آرزو میری نہ پوری ہو کوئی بات ہے یہ
کاش اتنا وہ سمجھ لیں کہ سوال اچھا ہے
مفت ملتا ہے خرابات میں ہر مے کش کو
ٹھرا پینے کے لیے جامِ سفال اچھا ہے
سینکڑوں برق جمالوں کا گزر ہوتا ہے
طورِ سینا سے مرا بامِ خیال اچھا ہے
ہوں گدائے درِ مے خانہ‘ تکلف سے بری
ٹوٹا پھوٹا یہ میرا جامِ سفال اچھا ہے
حال سنتے نہیں بے خود ہیں یہ مسجد والے
ان سے کچھ مے کدے والوں ہی کا حال اچھا ہے
دفعتاً ترکِ محبت میں ضرر ہے جی کا
رفتہ رفتہ جو مٹے دل سے خیال اچھا ہے
اب کے ہر شہر میں پھیلا ہے جو طاعون‘ حفیظ
مرنے والوں کو خوشی ہے کہ یہ سال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نظر لکھنوی
فتنہ زا فکر ہر اک دل سے نکال اچھا ہے
آئے گر حسنِ خیال اس کو سنبھال اچھا ہے
میرے احساسِ خودی پر نہ کوئی زد آئے
تو جو دے دے مجھے بے حرف سوال اچھا ہے
آپ مانیں نہ برا گر تو کہوں اے ناصح
صاحبِ قال سے تو صاحب حال اچھا ہے
بے خیالی نہ رہے خام خیالی سے بچو
دل میں بس جائے جو ان کا ہی خیال اچھا ہے
تیرے رخ پر ہو مسرت تو مرا دل مسرور
تیرے چہرے پہ نہ ہو گردِ ملال اچھا ہے
پرسشِ غم بھی نہیں نیز ملاقات نہیں
آپ کو ہم سے غریبوں کا خیال اچھا ہے
کوئی کہتا ہے مبارک ہو تجھے دورِ فراق
میں سمجھتا ہوں مگر روزِ وصال اچھا ہے
ملک گیری کی ہوس میں ہو تو فتنہ خود ہی
اور فتنہ کو مٹائے تو قتال اچھا ہے
بے نیازِ غمِ عقبیٰ جو نظر تجھ کو کرے
آل و اولاد وہ اچھی نہ وہ مال اچھا ہے
…..
کہیے کس درجہ وہ خورشید جمال اچھا ہے
مختصر یہ کہ وہ آپ اپنی مثال اچھا ہے
دوسروں کے دل نازک کا خیال اچھا ہے
کوئی پوچھے تو میں کہہ دیتا ہوں حال اچھا ہے
آئے دن کی تو نہیں ٹھیک جنوں خیزیٔ دل
موسمِ گل تو یہ بس سال بہ سال اچھا ہے
مجھ کو کافی ہے میں سمجھوں گا اسے حسنِ جواب
بس وہ فرما دیں کہ سائل کا سوال اچھا ہے
یہ جو بگڑا، تری تقدیر بگڑ جائے گی
دل ہے دل یہ اسے جتنا بھی سنبھال اچھا ہے
اس سے زائل ہو نظر، اس سے ہو دل تک روشن
روئے خورشید سے وہ روئے جمال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہاجر دہلوی
سوچتا ہوں کبھی حوروں کا خیال اچھا ہے
کبھی کہتا ہوں کہ اس بت کا جمال اچھا ہے
مجھ سے کہتے ہیں کہو عشق میں حال اچھا ہے
چھیڑ اچھی ہے یہ اندازِ سوال اچھا ہے
نہ ادائیں تری اچھی نہ جمال اچھا ہے
اصل میں چاہنے والے کا خیال اچھا ہے
دیکھ کر شکل وہ آئینہ میں اپنی بولے
کون کہتا ہے کہ حوروں کا جمال اچھا ہے
جو ہنر کام نہ آئے تو ہنر پھر کیسا
کام جو وقت پر آئے وہ کمال اچھا ہے
وہ جوانی وہ ادا اور وہ قد موزوں
دیکھ کر بول اٹھا دل بھی کہ مال اچھا ہے
ہجر میں دل نے کہا کوچۂ جاناں میں چلو
شوق کم بخت یہ بولا کہ خیال اچھا ہے
یوں تو عاشق کے لیے دونوں وبالِ جاں ہیں
ہجر سے پھر بھی ہر اک طرح وصال اچھا ہے
آپ جب ہوتے نہیں اس کا تو پھر ذکر ہی کیا
آپ جب سامنے بیٹھے ہیں تو حال اچھا ہے
جلوہ افروز ہوں جب آپ نظر کے آگے
وہ مہینہ وہ گھڑی اور وہ سال اچھا ہے
اس نے جب پیار سے پوچھا کہ کہو کیسے ہو
منہ سے بے ساختہ یہ نکلا کہ حال اچھا ہے
لطف سے خالی نہیں جور بھی ان کا ہاجر
جو حسینوں سے ملا ہے وہ ملال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محمد یوسف راسخ
حسن اچھا ہے، محمد کا کمال اچھا ہے
جو خدا کو بھی ہے پیارا وہ جمال اچھا ہے
بزمِ کونین مرتب ہوئی تیری خاطر
وقف ہے تیرے لئے اس میں جو مال اچھا ہے
مجھ سے پوچھے تو کوئی تیرے غلاموں کا عروج
بادشاہوں سے بھی رتبے میں بلال اچھا ہے
غم اٹھانے کی ہے عادت مری طبعِ ثانی
میں تو کہتا ہوں کہ دنیا میں ملال اچھا ہے
قصۂ طور سے واقف ہے زمانہ سارا
کوئی کس منہ سے کہے شوقِ جمال اچھا ہے
بزم میں دیکھ کے حسرت سے کسی کو چپ ہوں
در حقیقت یہی اندازِ سوال اچھا ہے
جس میں اک دن بھی میسر ہو ملاقات کی رات
میرے نزدیک تو وہ ماہ وہ سال اچھا ہے
لطف دیتا ہے مجھے تیرا تصور شب غم
سچ کہا کرتے ہیں اچھوں کا خیال اچھا ہے
جب سے دیکھے ہیں تمہارے لب و ابرو ہم نے
نہ کہا ہے نہ کہیں گے کہ ہلال اچھا ہے
تجھ سے ہٹ کر کہیں پڑتی ہی نہیں میری نظر
یوں تو یوسف کا بھی ہونے کو جمال اچھا ہے
اس نے دیکھا ہی نہیں قامتِ زیبا تیرا
جو یہ کہتا ہو کہ گلشن میں نہال اچھا ہے
پھر وہی ذکر ہے اربابِ کرم کا راسخ
ہم سمجھتے ہیں یہ اندازِ سوال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نسیم نیازی
نہ جواب اچھا ہے، اے دل! نہ سوال اچھا ہے
بس وہ جس حال میں رکھے وہی حال اچھا ہے
کون سا رنگ ہے جو اس پہ نہیں پھبتا ہے
کیونکہ ہر رنگ میں وہ رنگِ جمال اچھا ہے
جس طرف اٹھتی ہیں دیوانہ بنا دیتی ہیں
آپ کی نظروں میں صاحب یہ کمال اچھا ہے
آپ کو دیکھ کے بیمار شفا پائے گا
آپ آ جائیں تو بیمار کا حال اچھا ہے
میری قسمت کی لکیروں کو بدل کر مجھ سے
وہ ابھی کہہ کے گئے ہیں کہ یہ سال اچھا ہے
عشق کی راہ یہ مانا کہ ہے دشوار نسیم
اس حقیقت کو سمجھ اس کا مآل اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رؤف رحیم
اک برہمن نے کہا ہے کہ یہ سال اچھا ہے
ہم سے خوش فہموں کا یارو یہ خیال اچھا ہے
نہ حرام اچھا ہے یارو نہ حلال اچھا ہے
کھا کے پچ جائے جو ہم کو وہی مال اچھا ہے
صرف نعروں سے غریبی تو نہیں مٹ سکتی
ملک سے سارے غریبوں کو نکال، اچھا ہے
ساتھ بیگم کے ملا کرتے ہیں دس بیس ہزار
مفت کے مالوں میں سسرال کا مال اچھا ہے
نرس کو دیکھ کے آ جاتی ہے منہ پہ رونق
وہ سمجھتے ہیں کہ بیمار کا حال اچھا ہے
جھڑکیاں سن کے ادھر ہم کو ادھر ڈانٹتے ہو
اپنی گھر والی کا عملے پہ وبال اچھا ہے
دام غلے کے ہوئے جاتے ہیں سر سے اونچے
اچھے لیڈر ہو غریبوں کا خیال اچھا ہے
تمکنت چال میں چہرے پہ متانت آئی
حسن اس شوخ کا مائل بہ زوال اچھا ہے
اپنے استاد کے شعروں کا تیاپانچہ کیا
اے رحیم آپ کے فن میں یہ کمال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ماچس لکھنوی
جب کہ ماضی سے بہت پست بھی حال اچھا ہے
پھر تو مستقبل رنگیں کا خیال اچھا ہے
جس کا جو ذوق ہو اس کو وہی آتا ہے پسند
میں تو کہتا ہوں کہ دونوں کا خیال اچھا ہے
کچھ الیکشن میں تو کچھ نام پہ غالبؔ کے کماؤ
اک برہمن نے کہا ہے کہ یہ سال اچھا ہے
چارہ گر کہتے ہیں بس موت کی باقی ہے کسر
اور ہر طرح سے بیمار کا حال اچھا ہے
نہیں معلوم اگر سانپ کا منتر تو نہ پھنس
ہاتھ اس سانپ کی بانبی میں نہ ڈال اچھا ہے
جو بھی ہارے گا وہی گالیاں دے گا اس کو
جس برہمن نے کہا ہے کہ یہ سال اچھا ہے
ڈھونڈیے خیر سے جا کر کوئی موٹی سسرال
ہاتھ جو مفت میں آئے تو وہ مال اچھا ہے
بین ہی بین گزرتے رہو اس وادی سے
نہ حرام اچھا ہے بالکل نہ حلال اچھا ہے
ایک ہم تھے جو سیاست میں کما پائے نہ کچھ
ورنہ ماضی کے فقیروں کا بھی حال اچھا ہے
جتنے ہیں دہر میں ہاتھوں کی صفائی کے کمال
سب سے اے دوست گرہ کٹ کا کمال اچھا ہے
جس کی بچپن ہی میں شادی ہو وہ کیا جانے غریب
عشق میں ہجر ہے بہتر کہ وصال اچھا ہے
اور تو کچھ بھی نہیں حضرتِ ماچس‘ لیکن
آپ میں آگ لگانے کا کمال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فضل حسین صابر
سیرت اچھی ہے تری یار جمال اچھا ہے
تو بہر طور بس اے نیک خصال اچھا ہے
بے قراری ہے وہ اگلی سی نہ وہ دردِ جگر
اب تو کچھ کچھ ترے بیمار کا حال اچھا ہے
کب ترے خالِ منور سے ہیں تارے اچھے
کب ترے ابروئے پر خم سے ہلال اچھا ہے
ایک بوسہ پہ جو دل دیتا ہے صابر لے لو
مول کم ہے‘ مگر اے جان! یہ مال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
استاد رام پوری
کوٹھڑی ٹھیک نہ کوٹھی کا خیال اچھا ہے
یار جس حال میں رکھے وہی حال اچھا ہے
مارچ میں عقد ہوا اور ستمبر میں طلاق
کوئی بتلائے برا ہے کہ یہ سال اچھا ہے
ناتواں قیس ہے اب کون اسے سمجھائے
ایسے حالات میں لیلیٰ کا وصال اچھا ہے
بے حجابی نہیں معشوق کی فطرت اے دوست
بدر سے میں تو سمجھتا ہوں ہلال اچھا ہے
رات لڑنے لگے استاد سے طوفان سخن
لوگ کہنے لگے منشی کا خیال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رنج حیدر آبادی
دل مرا لے کے یہ کہتے ہیں کہ مال اچھا ہے
منتیں خوب ہیں اور ان کا خیال اچھا ہے
وہ عیادت کو مری آ کے یہ فرماتے ہیں
شکر صد شکر کہ بیمار کا حال اچھا ہے
میں یہ کہتا ہوں کہ آغازِ محبت ہے خراب
وہ یہ کہتے ہیں محبت کا مآل اچھا ہے
ساتھ یوسف کے تجھے مصر میں گر لے جاتے
انگلیاں تیری طرف اٹھتیں یہ مال اچھا ہے
تیری صورت سے میں دوں کیا مہِ کامل کو مثال
اس سے سو درجہ ترا حسن و جمال اچھا ہے
دل کو دزدیدہ نگاہوں سے چرا لے جانا
تم میں اتنا ہی مری جان کمال اچھا ہے
وہ عیادت کے لئے غیر کے گھر جاتے ہیں
ہم مرے جاتے ہیں کمبخت کا حال اچھا ہے
ٹوٹ جانے کا نہ کچھ رنج نہ کھو جانے کا
ہم غریبوں کا یہی جامِ سفال اچھا ہے
اپنی قسمت میں کہاں راحت و آرام و نشاط
رنج! دنیا میں یہی ہم کو ملال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
واحد انصاری برہانپوری
سب دلالوں میں طوائف کا دلال اچھا ہے
جس طرح کا بھی کسی میں ہو کمال اچھا ہے
دیکھ کر شکل طبیبوں کی جب آتی ہے ہنسی
وہ سمجھتے ہیں کہ بیمار کا حال اچھا ہے
جیب خالی ہو تو پھر شہد لگے زہر ہمیں
جی میں کہتے ہیں کہ مفت آئے تو مال اچھا ہے
خوش ہو اے دل کے ملے گی تجھے دولت غم کی
اک برہمن نے کہا ہے کہ یہ سال اچھا ہے
کوئی احمق ہی نہ مانے گا اگر میں یہ کہوں
ساغرِ جم سے مرا جامِ سفال اچھا ہے
صحبت حور ملے یا نہ ملے ہم کو مگر
’’دل کو بہلانے کو غالب یہ خیال اچھا ہے‘‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
راجہ نوشاد علی خان
ماہ اچھا ہے کہ وہ بدر کمال اچھا ہے
دیکھنا ہے یہ ہمیں کس کا جمال اچھا ہے
آپ کی چشمِ عنایت نے سنبھالا اس کو
آج تو آپ کے بیمار کا حال اچھا ہے
حال جب ہوگا برا دیکھنے وہ آئیں گے
لوگ کہتے ہیں برا جس کو وہ حال اچھا ہے
جس سے ملتے ہیں ملاتے ہیں اجل سے اس کو
چشمِ قاتل میں تمہاری یہ کمال اچھا ہے
وصل جب اس بتِ کافر کا میسر ہو جائے
روز وہ اچھا، وہ ماہ اچھا، وہ سال اچھا ہے
خال و ابرو میں تمھی فیصلہ کر دو کوئی
بدر اچھا ہے تمہارا کہ ہلال اچھا ہے
حوریں جنت کی نہ کام آئیں گی اپنے نوشاد
ان حسینوں کا مگر حسن و جمال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جینا قریشی
ناصحا تو ہی بتا کیا یہ خیال اچھا ہے
طائرِ دل کے لئے عشق کا جال اچھا ہے
در بدر تھے ہی پہ اب عشق نے پاگل بھی کیا
نیم جاں پھرتے ہو کہتے ہو کہ حال اچھا ہے
شاملِ فطرتِ آدم ہے ازل سے ہی خطا
سو خطاؤں پہ جو کرتا ہے ملال اچھا ہے
میں نے پوچھا تھا کہ پھر وصل میسر ہوگا
اس نے بس اتنا کہا تھا کہ سوال اچھا ہے
کام آیا کسی مزدور کے ایندھن بن کر
سنگِ نایاب سے ریحانِ غزال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احمد شاہ خان شبنم
تیری ابرو پہ صنم کیا ہی یہ خال اچھا ہے
ایسے کعبہ کے لئے یہ ہی بلال اچھا ہے
دل مرا دیکھ کے منہ پھیر کے نفرت سے کہا
یہ تو کچھ بھی نہیں سنتے تھے کہ مال اچھا ہے
غیر کے ساتھ وہ آتے ہیں عیادت کے لئے
ان سے کہہ دے کوئی جا کر مرا حال اچھا ہے
آج اس بت کو دکھا لائے تجھے اے واعظ
اب نہ کہنا کبھی حوروں کا جمال اچھا ہے
جامِ جم چاہئے شبنم کو نہ اے پیرِ مغاں
جلد دے بھر کے یہی جامِ سفال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
داغ دہلوی
آپ پچھتائیں نہیں جور سے توبہ نہ کریں
آپ کے سر کی قسم داغ کا حال اچھا ہے
نامعلوم
وہ عیادت کے لئے آئے ہیں لو اور سہی
آج ہی خوبیٔ تقدیر سے حال اچھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔